Txapelak badu nork jantzi, badugu txapelduna

        
   
    Atzo eguerdian, Santurtziko I. Pintxo Txapelketa Euskalduna egin genuen. 5 tabernak hartu zuten parte: Lagun Etxeak, Herriko tabernak, Txistu tabernak, Jon tabernak eta Novo Muiño-Errotaberri tabernak. Zoriooonak eta eskerrik asko zinez guzti-guztioi!!! Maila gorena dugu herrian pintxotan, bai horixe! A zer-nolako pintxoak! Kategorikoak! Zein baino zein gozoagoa! Epaimahaikooi lan zaila jarri ziguten, egiatan!

     Dastatzaileak bilduta, hastera goaz!

Hona hemen ibilbidearen arabera ordenatuta:

Lagun Etxea

Arrautza

Herriko taberna

Patata habia

Txistu taberna

Txanpiñoi otzara

Jon taberna

Otarrainxka pintxoa

Novo Muiño Errotaberri taberna - Txanpiñoi pintxoa

Arestian esan bezala, lehia estua izan zen. Epaimahaikook lan zaila izan genuen. Baina norbaitek irabazi behar, txapel bakarra zegoen eta azkenean:

NOVO MUIÑO-ERROTABERRI tabernak 

 irabazi zuen. ZORIOOONAK!!! 

Zoriooonak, txapeldunak!!!

Pintxo irabazlea

Bai Esaneko kide batzuk irabazleekin

Epaimahaiko gehienak, ez denak

Zoriooonak, txapelduna!!!

Emaitzak honako hauek izan dira:
1. Novo Muiño Errotaberri 8,7
2. Herriko taberna 7,69
3. Lagun Etxea 7,11
4. Txistu taberna 6,65
5. Jon taberna 6

Goizean, itsas museora!!!

Atzo goizean, Santurtziko itsas museora joan ginen. Bertan hobeto ezagutu gura genuen gure herriaren historia, zer-nolako garapena izan duen, zelakoa zen antzina, zelakoak ziren lehengo santurtziarrak, zertan aritzen ziren, ...

Hori guztia ezagutzeko asmotan joan bai, baina... asmoak asmo: euskarazko testuak arinegi igarotzen ziren, ez zegoen irakurtzeko modurik, birritan ikusita ere, esaldi erdiak besterik ezin izan genuen irakurri; holakoetan, hobe audioa grabatzea, irakurtzeko badago kanpoko guztia eta (eskerrak hormetakoak ezin direla mugitu, osterantzean....). Hori gutxi ez, eta batzuk ibili ere ez zebiltzan; ezin izan genuen ikusi Maria Errenteria nor zen, esaterako. Penagarria!!! Holako museoa, berri-berria, eta holako akatsak!!! Ez dut uste behin ere ikusi dutenik, euskaraz, behintzat, nahikoa da eta konturatzeko. Gainera, itzelezko hotza zegoen, kanpoan baino hotz handiagoa! Kontserba-museoa izateko primerakoa!

Argazki guztiak hemen!

 Itxaso Antuñano Zeanuri

EUSKARAZ BIZI NAHI DUT MENDI-IGOERA

Abenduaren 1ean, domeka, goizeko 10etan, Euskararen Asteko egitarauren barruan: SERANTES MENDIRA IGOKO GARA.

Domeka goizeko 10etan, San Jorge elizaren arkupeetan elkartuko gara. Tipi-tapa tipi-tapa gorantza joango gara, eta, tontorrean gaudela, talde-argazkia aterako dugu, EUSKARAZ BIZI NAHI DUT! bandera eskuetan. 

Zuk ere gurekin etorri gura baduzu, idatzi iezaguzu mezua lehenbailehen hona: baiesan@kaixo.com

ERDU GUGAZ EUSKARAZ GOZATZERA!!!

GUK BAI ESAN EUSKARARI EUSKARAZ TONTORREAN BERE!!!

Santurtziko Euskararen Astea

Olentzerok etxera gonbidatu zaitu aurten ere, hirugarrenez!

Aizu, Olentzerok eskutitz hau bidali digu zuretzat aurten ere, hirugarrenez:
 

Olentzero                                                         
Olentzeroren baserria
Landetxo Goikoa
48100 Mungia

Bai Esanen lagun maitea:

Abenduaren 6an, barikuan, festa egingo dut etxean eta zeu ere Bai Esanekoekin batera etortzea nahiko nuke. Santurtziko euskara elkartekoek oso ondo egin didate berba zutaz eta ezagutzeko gogo handia daukat. Goiz zoragarria izango da, bertan lagun asko izango dira eta: Mari Domingi, Lamiak, Maritxu Teilatuko, Galtzagorriak, Tartalo, Basajaun, Anbotoko Mari... Bi ordu magiko igaroko ditugu elkarrekin. Eta gogoratu: Izena duen guztia bada!

Goizeko 9etan atarian egongo gara zuen zain, ez huts egin! 

Musu potolo bat

Olentzero

Oharra: Animatzen bazara, idatz iezaiezu mezua Bai Esanekoei lehenbailehen hona: baiesan@kaixo.com  

Hemen izango gaituzu zain, geure baserrian!

Aurten, hirugarrenez joango gara. Aurrekoetan zein ondo igaro dugun ikusi gura baduzu, klikatu hemen eta hemen.

 Izenaduba Basoa:

Euskal Herriko lehen parke mitologikoa da Izenaduba Basoa (Izena duen guztia bada, ba). Hor gure mitologia eta tradizioak ezagutuko ditugu jolasaren eta olgetaren bidez, ingurune berezi eta bitxian. Ingurune magikoa nagusi eta umeentzat.
Landetxo Goikoa bera ere lehen euskal baserriaren (1510 inguru) erakusgarririk onena dugu. bertan Baserri magikoa erakusketa ere ikus daiteke, bitxia eta jakingarria.

 Landetxo Goikoa, gaur egun Olentzeoren eta beraren lagunen baserria, Bizkaiko baserririk aspaldikoena eta preziatuena da. Gaur egun arketipoa da Bizkaiko baserrien artean. Atari zabalekoa da, eta baserriaren aurrealdea hiru zatitan dago banatuta... lehen aldiz abereak eta etxekoak teilatupe berean. 1510. urtean eraiki zen, eta bertan, baserritar familia dirudun bat bizi zen. Aurreko garaietan baserriak bailarako zonalde garaietan eraikitzen bazituzten ere, lapurrengandik eta erasoetatik babesteko, Landetxo Goikoa herritik gertu jasotakoa da. Garaiko jauntxoen arteko guda eta liskarrak amaitzen ari ziren seinale. 
Landetxo Goikoa baserriaren aurrealdeko egurrezko leihoak baserriaren bitxitasunaren adierazle dira. Garai hartako bizilagunek, aisialdi garaietan, atsedenerako erabiltzen zuten baserri hau, eta beste garaietan ganbara moduan. Bestalde, leihoen garaiera medio, ez zuten ezusteko "bisitaririk" izaten. Tximinia baserriko bizitzaren ardatza, bilgune eta batez ere berotasunaren iturri zen. Tximiniaren berreraikuntzak lan handia suposatu zuen, izan ere, haritzaren egurrarekin eta garaiko teknikak erabilita egin baitzen. 
Landetxo Goikoa baserriak garai hartako biztanleen bizimodua ezagutzeko aukera paregabea eskaintzen digu. Beheko suaren garrantzia, bihitegiaren kokapena... Landetxo Goikoa baserriak banandu zituen lehen aldiz animaliak eta pertsonak teilatupe berean.
Olentzerok aurkeztuta, bisitariok ibilbide magikoa egingo dugu: filmen, jokoen, tailerren... bitartez, gure ipuinen kondairen haitzuloraino. Era dibertigarria, txikienak eta nagusiok gurea ezagutzeko, Olentzerorekin batera. 
Eta kanpoko jolasek, hainbat belaunaldi eskutik helduta, gure mitologia ezagutzen lagunduko digute. Pertsonaiak, ohiturak, kondairak... mitologia jolas bihurtuta.

a

MARITXU TAILETUKO, GONA GORRIDUNE, EUTSI HAGIN ZAHARRA ETA EKARRI BARRIE!!! 
Umeari hortza (esneko hortza edo txantxurra) jausten zaionean, burkoaren azpian itxi edo teilatura bota eta Maritxu teilatukoari esan! Maritxu Tailetukok izar bihurtuten ei deitxuz!

Iaz egon ginenok zein ondo igaro genuen ikusi gura baduzu, klikatu hemen!

Itxaso Antuñano Zeanuri

 

Itsas museoaren ostean, Santurtziko I. Pintxo Txapelketa Euskalduna

          Azaroaren 23an, zapatuan, etorri gurekin Santurtziko itsas museoa bisitatzera, doakoa da. Goizeko hamaiketan hasiko dugu bisita itsas museoan, kaian. Momentu aproposa izango da gure herriko historia hobeto ezagutzeko, batez ere zelakoa zen arrantzaleen bizitza, antzinako kaia... Itzela izango da! Zatoz!

Bisitaren ostean, Santurtziko I. Pintxo Txapelketa Euskalduna antolatu dugu. 12ak aldera, Txitxarran tabernarik taberna ibiliko gara, bost tabernak aurkeztuko dituzten pintxoak dastatzen. Ibilbidea honako hau izango da: Lagun Etxea, Herriko taberna, Txistu, Pleamar, Jon eta Errotaberri (Novo Muiño). Pintxo-poteak 2 € balioko du. Nor izango ete da irabazlea? Zure botoa beharrezkoa izango da, lagundu erabakitzen Bai Esanen Pintxoa. ETORRI GUGAZ EUSKARAZ GOZATZERA!!!

Parte hartu gura izanez gero eta informazio gehiago lortzeko, idatzi mezua hona lehenbailehen, lekuak mugatuak dira eta: baiesan@kaixo.com.

Eskarrik asko parte hartuko duzuen tabernei eta onenak irabaz dezala!!!

Bai Esan pintxoa aukeratuko dugu denon artean.

Azaroko agendak

EUSKARAK BEHAR ZAITU!!! ZATOZ!!!

Agur t’erdi, euskaldunok eta euskaltzaleok! 

Oporren ostean berriro gatoz gogotsu euskararen alde lan egitera, baina ez dugu zu barik hasi gura. Euskarak Santurtzin, gure herrian, denon beharra du, batez ere zeurea. Euskarak behar gaitu, bazatoz? Elkartekidea izateko ez duzu agiririk edo titulurik behar, euskaltzalea izatea nahikoa da!

Bazatoz, ezta? Idatzi, bada, mezua hona: baiesan@kaixo.com

Euskarari zure aletxoa eman nahi badiozu, Bai Esan euskara elkartean parada ezin hobea daukazu. Anima zaitez!

Atzo, III. bertso-triki-poteoa jaietan! Ederto baten!!!

Atzo arratsaldean, garagarrilak 15, Fredi Paia eta Ekaitz Larrazabal "Katxo" getxoztarrak bertsotan eta Iban Lantxo eta Aner Sertutxa panderoa eta trikitia jotzen ibili ziren euskal txosna-gunean, Bai Esan euskara elkarteari esker.

Zoritxarrak ez zuen gura izan Arkaitz Estiballes gure artean izaterik, aita auto-istripuan hil zitzaion joan den astean eta. Goian bego! Bihoazkie gure doluminak hemendik Arkaitzi eta etxeko guztiei! Sumatzen genuen ez zela etorriko, baina azken unera arte ez genuen jakin. Estiballesen ordez, Katxo, Ekaitz Larrazabal Gutierrez getxoztarra (baina, atzo jakin ahal izan genuenez, Santurtzin jaioa, San Juan de Diosen, hain zuzen ere), etorri zen. Ederto ibili ginen!

Eskerrik asko hurbildu zineten guztioi!!! Datorren urtean ere bertso-triki-poteoa egiteko asmoa dugu, egun eta ordu berberetan. Beraz, gorde ezazue eguna gugaz egoteko: IV. bertso-triki-poteoa jaietan Santurtziko 2014ko Karmen jaietako astelehenean, uztailak 14, arratsaldeko 8etan! Edo agian hobe 7:30ean, osterantzean, gero 10etan beti kontzertuak egoten direnez, larri ibiltzen gara garaiz amaitzeko eta.

Ekaitz Larrazabal Gutierrez, "Katxo": 1979, Algorta, Getxo AEKko irakaslea. ALBEko (Algortako Bertsolari Eskolako) kidea dogu eta 2006ko Ipar Uribeko txapeldunordea. San Nikolas ikastolan, lagunekaz parrandan eta ALBEn emon ebazan lehenengo pausoak. Gasteizko ikasleen taldekako sariketan zein Abra sariketan be abestu dau.

Hor duzue GURE TXOSNA, gure diru-iturri bakarra! Polita, ezta? Txosnarik onena: pantaila erraldoia, euskaraokea, bertso-triki-poteoa, mojito gozoak, Santurtziko argazki zaharrak, gure ekitaldietako argazkiak eta bideoak... GIRO EZIN HOBEA!!! Hurbildu zaitezte jaietan, eta gogoratu gurean kontsumitzen duzuen bakoitzean, herria euskalduntzen laguntzen duzuela. ERDU!!!

Argazki gehiago, hemen! Eta hemen, bideoak!!!

Itxaso Antuñano Zeanuri

III. bertso-triki-poteoa jaietan

Karmen jaietan, hirugarrenez, bertso-triki-poteo mundiala antolatuko dugu, garagarrilaren 15ean, astelehena, arratsaldeko 8etan, Santurtziko portuan, euskalgunean, gure txosnan hasita. Gonbidatu dugun bertsolari-bikotea paregabea da: Arkaitz Estiballes Ormaetxea galdakaoztarra eta Fredi Paia Ruiz getxoztarra, Bizkaiko txapelduna eta hirugarrena, hurrenez hurren; trikitilariak ere apartak: Iban Lantxo Serrano pandero-jotzailea eta Aner Sertutxa Antruejo trikitilaria, sestaoarrak. Mundiala izango da; beraz, GORDE HITZORDUA ETA ERDU GUGAZ EUSKARAZ GOZATZERA!!!

Bestalde, gogoratu gure txosna dela gure diru-iturri bakarra, hor ateratzen dugun diruari esker antolatzen ditugu honelako ekitaldiak. EGIGUZU BISITA!!!

 

Hemen hasita, geure txosnan:

Itxaso Antuñano Zeanuri

Fredi Paia Ruiz (Algorta, 1981-) bertsolaria da. Gurasoek euskara jakin ez arren, euskaraz ikasi zuen eta Bizkaiko Bertsolari Txapelketaren finalera heldu den lehen euskaldun berria izan da. Berria egunkarian ere idazten du zutabe bat astero.

Arkaitz Estiballes Ormaetxea (Galdakao, Bizkaia, 1977) bertsolari bizkaitarra da. Euskal Filologian lizentziatua da eta hezkuntza arautuan dabil bertsolaritza sustatzen.
Galdakaoko Eguzkibegi Ikastolak antolatutako 2009ko Ibilaldiaren abestiaren leloa sortu zuen eta Biok musika-talde galdakoztarrak musika jarri zion. Arkaitz Estiballes zein Biokeko taldekideak Eguzkibegi Ikastolaren ikasle ohiak dira.
2009ko irailean, Fernando Andreu Auzitegi Nazionaleko epaileak, Gaztesarea webguneari babesa adierazteagatik, "erakunde armatuarekin" kolaboratzea egotzi zion beste zortzi lagunekin batera.^[1]

^Wikipedia

^{Gogoratu geure txosnan kontsumitzen duzun bakoitzean gure herria berreuskalduntzen laguntzen duzula. Arrantza-portutik hasita, 5. txosna da gurea. Edan bitartean, erdian dugun pantailan ipintzen ditugun argazki ederrez gozatu ahalko zara. Bertan agertu gura baduzu, eskatu argazkia ateratzeko! Primeran pasatuko duzu! EGIGUZU BISITA!!!}

Txanda txosnan

Badakizunez, Karmen jaietako txosna da gure diru-iturri bakarra, guri udalak ez digu inolako diru-laguntzarik emoten eta. Urtean zehar, Santurtzin euskararen erabilera bultzatzeko antolatzen ditugun ekitaldi guztiak txosnan ataratako diruarekin ordaintzen ditugu. 

AURTEN, INOIZ BAINO JENDE GEHIAGO BEHAR DUGU, TXANDAK EGITEKO!!! Lagundu gura diguzu? Jarri hartu-emonetan gurekin, hona mezua bidalita: baiesan@kaixo.com

Txanda egiten ausartzen ez bazara edo ezin baduzu, EGIGUZU BISITA, BEHINTZAT, JAIETAN!!! Eskatzen duzun edari bakoitzak herria berreuskalduntzen lagunduko du. Arrantza-portuan egongo gara. Bilatu gure logoa:

Gainera, aurten pantaila ere edukiko dugu, baita hainbat ustekabe ere. Eta gogoratu: astelehenean, garagarrilak 15, urtero bezala, III. bertso-triki-poteoa jaietan, arratsaldeko 8etan, geure txosnan hasita. Erdu zeu bere!!!

 Itxaso Antuñano Zeanuri

Santurtziko II. euskal kantu-triki-poteo mundiala!!!

Atzo, bagilak 21, barikua, itzel igaro genuen Santurtziko II. euskal kantu-triki-poteo mundialean!!! Espero baino jende gutxiago etorri zen arren, talde polita osatu eta Txitxarra kantuz alaitu genuen. Gainera, erdaldun euskaltzale batzuk ere animatu ziren gugaz kantuan egiten. Pozgarria, egiatan!!!

 Txistu tabernaren aurrean geundelarik, bertako tabernariek pintxoak atera zizkiguten. Bai gozoak! Detaile polita! Eskerrik asko, Txistu!

Argazki gehiago, hemen!

Ikasturtearen amaiera ospatzeko, Santurtziko II. euskal kantu-triki-poteo mundiala egingo dugu Ezkerraldeko musikarien eskutik. Apuntatu ondo: bagilaren 21ean, barikua, arratsaldeko 8etan, Txitxarran, Lagun Etxea tabernan hasita.

Lehenengoa iaz egin genuen, Mintza Egunean. Gaueko ekitaldia izan zen, gogoratzen? Gogoan duzue zer ondo igaro genuen? Itzel, ezta? Bada, aurten ere errepikatu gura dugu. GORDE EGUNA ETA ZATOZ ZEU ERE!!!

Itxaso Antuñano Zeanuri

Hona hemen iazko argazki batzuk, gainerakoak Flickr-en!

BERRIAk 10 URTE: Ruper Ordorikaren kontzertua Santurtzin

Atzoko kontzertua itzela izan zen. Eskerrik asko BERRIA egunkariari, Ruper Ordorikari eta antolatzen lagundu zeniguten guztioi!!! ZORIOOOONAK BERRIA!!! URTE ASKOOOOOOOOOOOOOOOOOOOOOOOOOOOOOOOAN!!!!!

Santurtzin, 2013ko bagilaren 14an, barikua, SKAn.

Aurten, BERRIA egunkariak, euskara hutsean dugun egunkari bakarrak, 10 urte beteko ditu ekainaren 21ean. Ospatzeko, Hamarnaka kontatzekoak gara lelopean 32 kultur ekitaldi antolatu ditu Euskal Herri osoan, eta horietako bat Santurtzin: 

RUPER ORDORIKAren kontzertua ekainaren 14an, barikua, 20:30ean, Serantes Kultur Aretoan (SKAn) 10 €; harpidedunentzat eta berrialagunentzat 5 €

 

Kontzertuaren aurretik, Zertan ari da BERRIA? aurkezpena egongo da, ondoren, BERRIAk hamar urte bideoa eta, amaitzeko, kontzertua.

Sarrerak dagoeneko salgai daude hemen: http://www.berria.info/berriataldea/agenda_ikusi.php Eta herriko hainbat lekutan:

Arkupe prentsa-kioskoan (Mamarigan), Lagun Etxea tabernan (Txitxarran), Sotera tabernan (Mamarigan), AEKn (Santurtzin eta Portugaleten) eta  udal euskaltegian.

Gainera, BERRIAko lagunek gonbidapen batzuk eman dizkigute eta guk zuen artean zozketatu gura ditugu. Parte hartzeko, mezua bidali behar diguzu ekainaren 11 baino lehen gure postara: baiesan@kaixo.com

Amaitzeko, BERRIA egunkariak, lehenago esan legez, euskara hutsean dugun egunkari bakarrak, laguntza behar du eta kontzertura joatea, euskal musika gozatzeaz gain, egunkariari laguntzeko modua ere bada.

GOAZEN DENOK BERRIA EGUNKARIAREKIN BATERA 10. URTEURRENA OSPATZERA!!!

Oharra: Zozketan sarrera egokitzen bazaizu eta aldez aurretik baldin badaukazu, lasai, konpondu egingo dugu eta. Atxikita bidaltzen dizugu kartela.

Abesti hau Ruper Ordorikak egin zuen Euskaldunon Egunkaria itxi zutenean. Gozatu!!!

Itxaso Antuñano Zeanuri

ZORIONAK ETA URTE BARRI ON-ON!!!

ZORIONAK ETA URTE BARRI ON-ONA OPA DEUTSUEGU DANORI!!!

♫ Urte barri, txarri belarri, dekonak ez dekonari, nik ez dekot eta zuk niri, ezpabere mailutxu beteaz haginek kiskiti klauski ♫!!!

♪♪♪ Herri hau sortzen segi dezagun euskaratik ta euskaraz!!! ♪♪♪♪♪
IZAN ZORIONTSU ETA BIZI EUSKARAZ!!! MUSU POTOLO BANA!!!

2013AN ERE BAI ESAN EUSKARARI EUSKARAZ!!!